Singareni News | రాష్ట్రంలో కొత్త‌గా మిథనాల్ తయారీ ప్లాంట్ ఏర్పాటు
Singareni News | రాష్ట్రంలో కొత్త‌గా మిథనాల్ తయారీ ప్లాంట్ ఏర్పాటుసింగరేణి ఆధ్వ‌ర్యంలో దేశంలోనే తొలి ప్రయోగాత్మక ప్లాంట్రోజుకు 500 కేజీల కార్బన్ డయాక్సైడ్ నుండి 180 కేజీల మిథనాల్ తయారీకోల్ ఇండియా, ప్రైవేట్ సంస్థలతో కలిసి ఏర్పాటుకు సన్నాహాలుప్రయోగం సఫలం అయితే భారీ మిథనాల్ యూనిట్ స్థాపనకు రంగం సిద్ధంఈ ఏడాది డిసెంబరు 31 నాటికి పూర్తి చేస్తాం : సింగరేణి సీఎండీ ఎన్ బలరామ్ వెల్ల‌డి- - -
Hyderabad : రాష్ట్రంలో సింగరేణి సంస్థ మరో వినూత్న వ్యాపార విస్తరణ ఆవిష్కరణకు రంగం సిద్ధమైంది. దేశంలోనే మొట్ట మొదటి సారిగా కార్బన్ డయాక్సైడ్ నుంచి మిథనాల్ ను ఉత్పత్తి చేసే ప్రయోగాత్మక ప్లాంటును సింగరేణి థర్మల్ విద్యుత్ కేంద్రం ఆధారంగా ఏర్పాటు చేస్తోంది. సింగరేణి థర్మల్ విద్యుత్ కేంద్రంలో బొగ్గును మండించగా వెలువడే వాయువు నుండి రోజుకు 500 కేజీల పరిమాణం గల కార్బన్ డయాక్సైడ్ ను సేకరించి, దీనిని హైడ్రోజన్ వాయువుతో కుదింపు చేస్తుంది. చివరిగా మిథనాల్ ద్రవాన్ని పొందే ప్రక్రియను ఈ ప్లాంట్ లో చేపట్టనున్నారు. ఈ ప్రయోగాత్మక ప్లాంట్ నిర్మాణం ఇప్పటికే ప్రారంభమైందని, ఇది డిసెంబర్ 31 నాటికి పూర్తవుతుందని సింగరేణి సంస్థ సీఎండీ ఎన్ బలరామ్ తెలిపారు. ఈ మేర‌కు త్వరలో రాష్ట్ర ప్రభుత్వ అనుమతితో లాంఛనంగా ప్రారంభించనున్నట్లు వెల్లడించారు. సింగరేణి థర్మల్ విద్యుత్ కేంద్రంలో బొగ్గు మండించగా వచ్చే కర్బన ఉద్గారాలను 99.9 శాతం వరకు వాతావరణంలో కలవకుండా నివారించడం కోసం ఇ.ఎస్.పీ. (ఎలక్ట్రో స్టాటిక్ ప్రెసిపిటేటర్స్) ను నెలకొల్పారు. ఈ విధానంలో చివరిగా వాతావరణంలోకి అనుమతించబడిన వాయువు నుండి మాత్రమే ఈ కార్బన్ డయాక్సైడ్ వాయువును స్వీకరించడం జరుగుతుందని తెలిపారు. థర్మల్ పవర్ ప్లాంట్ చిమ్నికి అనుబంధంగా ఈ ప్రయోగాత్మక ప్లాంట్ నిర్మాణం జరుగుతోందన్నారు.
* సివిల్ నిర్మాణాలు పూర్తి..
కార్బన్ డయాక్సైడ్ నుండి మిథనాల్ తయారు చేసే ప్లాంట్ లో ఇప్పటికే సివిల్ నిర్మాణాలు పూర్తయ్యాయి. వీటిలో కార్బన్ డైయాక్సైడ్ కు సంగ్రహించే యూనిట్ ను, హైడ్రోజన్ జనరేషన్ , కంప్రెషన్, మిథనాల్ డిస్టిలేషన్ వంటి యూనిట్ ల‌ను ఏర్పాటు చేయనున్నారు. సింగరేణి సౌజన్యంతో, నిర్మాణ సారథ్యంలో కోల్ ఇండియా అనుబంధ రీసర్చ్ యూనిట్ అయిన సీఎం పిడిఐఎల్ వారి ఆర్థిక సహకారంతో, ఈ ప్లాంట్ నిర్మాణం చేపట్టుతున్నారు. నిర్మాణ బాధ్యత, ప్లాంట్ నిర్వహణను బెంగళూరుకు చెందిన జవహర్లాల్ నెహ్రూ సెంటర్ ఫర్ అడ్వాన్స్ డ్‌ సైంటిఫిక్ రీసెర్చ్, బ్రెత్ అప్లైడ్ సైన్సెస్ ప్రైవేట్ లిమిటెడ్ వారికి అప్పగించిన‌ట్లు ఆ సంస్థ తెలిపారు. అయితే ఈ ప్లాంట్ నిర్మాణానికి దాదాపు రూ. 20 కోట్ల రూపాయల ఖర్చు అవుతుంద‌ని అంచ‌నా వేశారు.
*మిథనాల్ తో బ‌హుళ ప్ర‌యోజ‌నాలు..
సింగరేణి ఆధ్వ‌ర్యంలో ప్రారంభం కాబోతున్న ఈ ప్రయోగాత్మక ప్లాంటు ప్రారంభమైన తర్వాత రోజుకు 180 కేజీల మిథనాల్ తయార‌వుతుంద‌ని అంచ‌నా. ప్రస్తుతం దీనిని ఎవరికీ విక్రయించడం లేదు. ప్రయోగం విజయవంతమైతే పెద్ద ఎత్తున మిథనాల్ ఉత్పత్తి కేంద్రాన్ని ఏర్పాటు చేయడానికి సింగరేణి సంస్థ సిద్ధంగా ఉంది. మిథనాల్ ను ఎరువుల తయారీలో, అక్రిలిక్ ప్లాస్టిక్, సింథటిక్ ఫైబర్ వస్త్రాల తయారీలో, ప్లైవుడ్, పెయింట్స్ తయారీలో కూడా విస్తృతంగా వినియోగిస్తారు. కాబ‌ట్టి వ్యాపార విస్తరణ చర్యలో భాగంగా పెద్ద ఎత్తున మిథనాల్ ప్లాంట్ ఏర్పాటు చేసి, ఈ మిథనాల్ ను వివిధ పరిశ్రమలకు సింగరేణి సంస్థ అమ్ముకునే అవకాశం ఉంది. దేశీయ అవసరాల కోసం వినియోగిస్తున్న 120 మిలియన్ టన్నుల మిథనాల్ లో దాదాపు 80 మిలియన్ టన్నులను ఇతర దేశాల నుంచి దిగుమతి చేసుకుంటున్నారు. దేశీయంగా ఉత్పత్తి దిశగా ఈ ప్రయోగాత్మక ప్రాజెక్టు విజయవంతం అయితే అది భవిష్యత్ లో ఏర్పాటు చేసే ప్లాంట్ల ద్వారా దేశానికి ఎంతో ఆర్థిక పురోగ‌తి కూడా ల‌భించే అవ‌కాశాలు ఉన్నాయ‌ని భావిస్తున్నారు.
* * *
Leave A Comment